„Син ми на 11 години не знае што е навивач, одел на тренинг кога го претепале“: Татко од Тетово револтиран по инцидентите со малолетниците

„Син ми на 11 години не знае ни што е навивач. Не скандирал, не носел знамиња, не бил на натпревар. Одел на тренинг кога го претепале.“

Со оваа порака тетовецот Дарко Гавроски остро реагира на квалификувањето на нападите врз малолетници во Тетово како „навивачки конфликти“, обвинувајќи дека на тој начин институциите ги изедначуваат жртвите со напаѓачите.

Гавроски, чиј син е меѓу нападнатите деца, смета дека ваквата квалификација од страна на Билал Касами и општинските власти е неприфатлива бидејќи, според него, станува збор за еднострани напади врз деца кои немале никаква поврзаност со навивачки групи.

„Навивачки конфликт не е тепање обични деца кои не се навивачи, а додека невини шетаат низ град. За зборот ‘конфликт’ треба двајца. Овде се работи за едностран насилен напад“, напиша Гавроски.

— реклама —

Тој посочува дека дел од нападнатите деца биле претепани додека се движеле низ градот, оделе на тренинг или јаделе за време на училишниот одмор, без претходно да провоцираат, навиваат или скандираат.

„Не се навивачи на утакмица ниту последните две тепани деца меѓу кои е и син ми. Со ова испаѓа дека он наместо жртва е една од навивачките страни. Тој на 11 години не знае ни што е навивач и не скандирал туку одел на тренинг“, наведува Гавроски.

Според него, претставувањето на нападите како навивачки пресметки создава погрешна слика дека нападнатите деца учествувале во меѓусебни конфликти, наместо да бидат препознаени како жртви на насилство.

„Со ова вие жртвите ги ставивте во иста кошница со напаѓачите па следствено и ‘си го барале’ па и арно што се истепани, зошто биле исто навивачи исто како тепачите. БРУКА!“, реагира тој.

— реклама —

Гавроски ги критикува и учесниците на панел-дискусијата одржана во Општина Тетово, обвинувајќи ги дека со прифаќањето на ваквото објаснување придонесуваат за релативизирање на сериозноста на случаите.

Тој се повикува и на претходни информации од Министерството за внатрешни работи за 12 меѓуетнички настани, тврдејќи дека институциите сега се обидуваат да ја претстават состојбата како обични навивачки конфликти.

Во својата реакција наведува и тврдења за постоење групи на социјалните мрежи со национално навредливи имиња, како и за напади во кои малолетници наводно биле запирани на улица, испрашувани каде живеат и каква облека носат.

Гавроски тврди дека имало и случаи во кои нападите биле снимани, а од деца било барано да ја соблечат облеката за да се провери бојата на нивните маици.

Овие наводи се дел од неговата јавна реакција и бараат проверка од надлежните институции.

— реклама —

Тој оценува дека недоволното институционално постапување во изминатата година придонело проблемот да се продлабочи, поради што бара да се испита одговорноста на училишните раководства, педагозите, психолозите, социјалните служби и надлежните полициски сектори.

„Јасно е дека непреземањето никакви чекори 1 година, метастазираше во ваков проблем“, наведува Гавроски.

Според него, самото организирање состанок со повеќе институционални претставници покажува дека станува збор за сериозна состојба, а не за изолирани навивачки инциденти.

Тој предупредува дека погрешното квалификување на нападите дополнително ги повредува децата кои веќе претрпеле физичко и психолошко насилство.

— реклама —

„Жртвите да ги правите дека се дел од навивачка група ‘па си го добиле’ е повредување на жртвите сега по вторпат – политички“, порача Гавроски.

На крајот, тој побара конкретни мерки за заштита на децата, наместо, како што вели, политички заклучоци и релативизирање на насилството.

„Бараме само МИР. Не флоскули. Нема да останете раат од реакции додека децава со страв излагаат на улица“, напиша Гавроски.

Неговата порака до институциите е дека безбедноста на децата мора да биде на прво место и дека ниту едно дете не смее да стравува дека ќе биде нападнато додека оди на училиште, тренинг или едноставно се движи низ градот.