Синдикатот на културата на Република Македонија (СКРМ) со остра реакција се осврна на заминувањето на министерот за култура и туризам, Зоран Љутков, оценувајќи дека неговиот мандат ќе остане запаметен по, како што наведуваат, обидите за укинување и обезвреднување на правата на културните работници.
Од Синдикатот посочуваат дека, наместо подобрување на условите за работа, во изминатите две години се водела политика на демонтажа на права што со години биле изборувани преку протести и преговори.
„Најголемата иронија е што тоа го правеше човек кој до вчера тврдеше дека е еден од културните работници. Наместо да биде гласот на културните работници во Владата, стана гласот на Владата против културните работници“, наведуваат од СКРМ.
Во реакцијата се додава дека промената на министерската функција ја дочекуваат со чувство на олеснување, но без големи очекувања.
„Не затоа што очекуваме чуда од новиот министер, туку затоа што полошо од политика во која сопствените институции и вработени се третираат како противници – тешко можеше да биде“, велат од Синдикатот.
Оттаму нагласуваат дека културата не бара привилегии, туку почитување на законите, Колективниот договор и достоинството на културните работници.
На крајот, СКРМ порачува дека останува да се види дали промената ќе биде само ново министерско име или ќе значи и промена на политиките, бидејќи, како што наведуваат, културата повеќе не може да си дозволи изгубено време.
