Интензивната интервенција за ставање под контрола на пожарите во селата од областа Каршијак продолжува и денеска, при што на терен се ангажирани сите расположливи државни ресурси.
Директорот на Центарот за управување со кризи, Мухамед Али, заедно со надлежните служби и екипи е на терен, каде ја следи и координира состојбата.
Главен приоритет е заштитата на планината Китка и спречувањето на натамошното ширење на огнената линија кон населените места.
Во гаснењето се вклучени три авиони на Дирекцијата за заштита и спасување, екипи на Противпожарната бригада на Град Скопје, како и тимови на „Национални шуми“.
Од ЦУК информираат дека во моментов нема опасност за селото Палиград, ниту за останатите населени места во областа Каршијак.
Состојбата ќе се следи непрекинато, а интервенциите ќе продолжат со засилено темпо сè до целосно стабилизирање на ситуацијата.
