Скапото гориво носи нов проблем во Германија: сè повеќе кражби на бензинските пумпи

Високите цени на горивото во Германија доведоа до зголемување на кражбите на бензинските пумпи, поради што дел од сопствениците почнаа да ги затвораат објектите во текот на ноќта.

— реклама —

Информацијата ја објави германското здружение на оператори на бензински пумпи, од каде што велат дека гориво крадат и помлади и повозрасни граѓани.

„Психолошката граница за кражба очигледно падна откако цените се приближија до 2,40 евра за литар. Некои едноставно си заминуваат од пумпата без да платат“, изјавил портпаролот на здружението Херберт Рабл.

— реклама —

Кражбите продолжуваат и покрај големиот ризик од откривање, бидејќи речиси сите бензински пумпи во Германија се под видеонадзор.

— реклама —

Според германските медиуми, поискусните крадци користат украдени регистарски таблички или ги прекриваат постојните за да го отежнат нивното идентификување.

Во септември цените на дизелот и поевтиниот бензин Е10, кој содржи до 10 отсто биоетанол, во Германија достигнале историски рекордни нивоа.

Растот на цените на горивото во Германија, како и во други делови од Европа, според информациите, е поврзан со влошувањето на состојбата во теснецот Баб ел Мандеб.