Склучил три договори за купопродажба на дрвни сортименти без соодветна постапка, кривична пријава за поранешен директор на „Ѓуриште“

Надворешната канцеларија за криминалистички работи Свети Николе поднесе кривична пријава против 62-годишниот Б.И. од Свети Николе, поради постоење основи на сомнение за сторено кривично дело „злоупотреба на службена положба и овластување“.

— реклама —

Според пријавата, во периодот од јули до ноември 2023 година, Б.И., во својство на директор на Шумско-стопанската единица „Ѓуриште“ – Свети Николе, не постапил согласно законските одредби за обезбедување транспарентен и конкурентен избор на правно лице.

— реклама —

— реклама —

Наместо спроведување соодветна постапка, тој склучил три договори за купопродажба на дрвни сортименти на пенушка со правно лице од селото Бузалково, велешко.

Со ваквото постапување, според сомнежите наведени во кривичната пријава, на правното лице му било овозможено да се стекне со противправна имотна корист во износ од 3.422.592 денари.