Во Скопје е отворен Центар за дневен престој наменет за лица со попреченост на возраст од 14 години и нагоре, со кој, како што истакна скопскиот градоначалник Орце Ѓорѓиевски, за првпат се обезбедува ваква услуга во градот.
Центарот е отворен во просториите на МКЦ, а на настанот присуствуваше и министерот за социјална политика, демографија и млади, Ѓоко Велковски.
Според Ѓорѓиевски, корисниците во Центарот ќе имаат пристап до психолошка и стручна поддршка, како и можност да учествуваат во едукативни, креативни и рекреативни активности. Предвидени се и активности за развивање практични и животни вештини, социјализација и зајакнување на самостојноста и самодовербата.
Градоначалникот нагласи дека Центарот ќе претставува поддршка и за семејствата, особено за родителите и старателите, кои секојдневно се грижат за своите најблиски.
„Никој не смее да се чувствува заборавен, оставен на страна или помалку вреден“, порача Ѓорѓиевски, додавајќи дека фокусот треба да биде ставен на способностите, можностите и потенцијалите на секој човек.
Тој посочи дека целта е Центарот да биде повеќе од простор за дневен престој – место за дружење, учење, развој, поддршка и создавање нови пријателства.
