Скопје утре домаќин на првата ноќна трка Centar Night Run

Улиците на скопската општина Центар утре, сабота, 7 ноември, ќе бидат домаќини на првото издание на CENTAR NIGHT RUN, нов спортски настан што ќе ги обедини тркачите и љубителите на спортот во ноќно тркачко доживување низ градските улици.

Учесниците ќе можат да избираат меѓу две дистанци – пет километри и полумаратон од 21 километар. За трката се пријавени учесници од повеќе градови во Македонија, меѓу кои Скопје, Тетово, Куманово, Охрид, Штип, Прилеп и Кавадарци, но и тркачи од Босна и Херцеговина, Косово, Чешка, Германија, Словачка, Русија, Турција и Италија.

— реклама —

Полумаратонот ќе започне во 17 часот, а трката на пет километри во 18 часот. Загревањето за учесниците на 21 километар е закажано за 16:45 часот, а за оние на пократката патека за 17:45 часот. Прогласувањето на победниците ќе се одржи во 19:45 часот.

Патеката ќе ги опфати Дебар Маало, улиците „Орце Николов“ и „Франклин Рузвелт“, булеварот „Илинден“, западната страна на булеварот „Св. Климент Охридски“, како и улиците „Наум Наумовски Борче“ и „Михаил Цоков“. Учесниците на трката од пет километри ќе истрчаат еден круг, додека полумаратонците ќе ја поминат патеката во четири круга.

— реклама —

Стартните пакети ќе се подигнуваат утре од 10 до 16 часот, на скверот пред Општина Центар во Дебар Маало, кај спомен-клупата на Горан Стефановски. Организаторите ги повикуваат учесниците навреме да ги преземат пакетите и да пристигнат пред почетокот на трката.

— реклама —

За најуспешните натпреварувачи е обезбеден награден фонд од вкупно 144.000 денари, со еднакви парични награди во машка и женска конкуренција. На полумаратонот првопласираните ќе добијат 20.000 денари, второпласираните 15.000, а третопласираните 10.000 денари. На трката од пет километри наградите изнесуваат 12.000 денари за прво, 9.000 за второ и 6.000 денари за трето место, одделно во машка и женска конкуренција.

Поради одржувањето на настанот, во реонот на патеката ќе има сообраќајни ограничувања. Организаторите апелираат до возачите да користат алтернативни правци и да ги следат насоките на надлежните служби.

— реклама —

Граѓаните се повикуваат навреме да ги преместат возилата од паркингот пред Општина Центар и од големиот паркинг пред вулканизерот, за да се овозможат непречени подготовки и реализација на трката.

Организаторите ги покануваат граѓаните да ја проследат трката од покрај патеката и да ги бодрат учесниците. Настанот го организира „Прв до Врв“, со поддршка на Општина Центар, со цел CENTAR NIGHT RUN да прерасне во нова спортска и урбана традиција.