Градоначалникот на Град Скопје, Орце Ѓорѓиевски, најави дека од оваа учебна година за првпат сите ученици запишани во прва година во средните училишта ќе добијат бесплатни училишни униформи.
Според него, целта на мерката е да се намалат социјалните разлики меѓу учениците, да се намали финансискиот товар за семејствата и да се создаде еднаква, побезбедна и попријатна училишна средина.
„Училиштето треба да биде место каде што младите ќе се натпреваруваат во знаење, труд и успех, а не во тоа кој носи поскапа облека и чии родители имаат поголема финансиска моќ“, порача Ѓорѓиевски.
Тој истакна дека униформите ќе придонесат за воспоставување еднаков кодекс на облекување, практика која веќе се применува во бројни современи образовни системи.
„Со оваа мерка им овозможуваме на учениците целосно да се посветат на образованието, личниот развој и градењето на својата иднина. Вредноста на еден ученик не се мери според облеката што ја носи, туку според знаењето, карактерот и соништата што ги гради“, нагласи градоначалникот.
Ѓорѓиевски додаде дека вложувањето во младите е вложување во иднината и најави продолжување на мерките насочени кон подобрување на условите за образование.
