СКРМ: Само 2,6 отсто зголемување на платите во културата предвидува буџетот за 2027 година

Синдикатот за култура на Република Македонија (СКРМ) изразува загриженост поради средствата предвидени за плати во културата во предлог-буџетот за 2027 година, оценувајќи дека проекцијата не е усогласена со методологијата од Колективниот договор за култура.

Од Синдикатот посочуваат дека во најголемиот дел од министерствата, државните агенции и другите институции од јавниот сектор се предвидени зголемувања на средствата за плати и надоместоци. Како пример го наведуваат високото образование, каде што, според нивните груби пресметки, зголемувањето изнесува околу седум отсто, односно просечно 6.173 денари месечно по вработен.

— реклама —

За разлика од тоа, во делот за основни плати во културата е предвидено само околу 2,6 отсто зголемување, што, според процените на СКРМ, би изнесувало приближно 1.560 денари месечно по вработен.

Од Синдикатот потсетуваат дека вработените во културата и високото образование имаат ист модел на пресметување на платите, врз основа на растот на минималната плата и утврдените коефициенти. Поради тоа, сметаат дека проекцијата за културата не ја следи методологијата од Колективниот договор, кој сè уште е важечки иако е пред Уставниот суд.

СКРМ ја поврзува предвидената сума со понудата на премиерот од 28 октомври за линеарно зголемување на платите од околу 1.500 денари по вработен. Според Синдикатот, тоа отвора сомнеж дека при подготовката на буџетот не е пресметано законското усогласување според Колективниот договор, туку понуденото линеарно покачување.

— реклама —

Од Синдикатот бараат од Владата, Министерството за финансии и Министерството за култура јавно да ја објават методологијата според која се пресметани средствата за плати во културата за 2027 година, бројот на предвидени вработени, месечните средства, висината на минималната плата земена како основа, како и информација дали се применети одредбите од членовите 65 и 66 од Колективниот договор.

СКРМ бара и да се разјасни дали во буџетската проекција е вклучена понудата на премиерот за линеарно зголемување од 1.500 денари.

— реклама —

Синдикатот предупредува дека ваквото планирање создава неизвесност во остварувањето на работничките права и отвора прашања за правната сигурност и почитувањето на колективното договарање. Оттаму нагласуваат дека постапката пред Уставниот суд не треба однапред да се користи како оправдување за неприменување на сè уште важечкиот Колективен договор.

СКРМ најавува дека официјално ќе ги извести и релевантните меѓународни институции, вклучително и Меѓународната организација на трудот, за, како што наведуваат, загрозувањето на правото на колективно договарање и непочитувањето на преземените обврски.

„Почитувањето на колективните договори не е прашање на политичка волја, туку на правна обврска“, порачуваат од Синдикатот, додавајќи дека борбата за почитување на колективното договарање ќе продолжи.

— реклама —