Пратеничката од СДСМ, Славјанка Петровска, со обемна јавна објава одговори на реакциите што следуваа по нејзиното учество на настанот „Разговори за Македонија“, порачувајќи дека нејзиниот ангажман не е насочен против партијата, туку, како што наведува, е „за СДСМ“.
Нејзината реакција следува откако лидерот на СДСМ, Венко Филипче, најави дека органите и телата на партијата следната недела ќе разговараат за учеството на пратеничката на настанот, на кој беше промовирана нова демократска платформа.
„Моето учество во Разговорите за Македонија не е против СДСМ, туку за СДСМ. Затоа што јас сум социјалдемократ и по убедување и по дејствување“, напиша Петровска.
Во објавата таа прави ретроспектива на својата политичка кариера, наведувајќи дека е член на СДСМ од 2000 година и дека останала во партијата и во периодите кога таа трпела изборни порази.
„Бев, сум и ќе бидам СДСМ“, истакнува Петровска, додавајќи дека не ја напуштила партијата ниту по изборните неуспеси во 2006, 2008, 2011 и 2014 година, ниту за време на политичките кризи, протестите и процесите што, според неа, довеле до промената на власта во 2017 година.
Таа потсетува дека била дел од СДСМ и во периодот на потпишувањето на Преспанскиот договор, како и во времето на другите значајни политички одлуки, а првата партиска функција ја добила дури во 2024 година, кога била избрана за претседавач на Централниот одбор на партијата.
Петровска наведува и дека во изминатиот период предложила ветинг на пратениците и раководството на СДСМ, како и измени на Статутот со цел поголеми овластувања да добие членството, но, како што пишува, на тие иницијативи не добила одговор.
„На Конгрес јасно и гласно пратив порака дека мора да се менуваме, инаку ќе исчезнеме“, наведува Петровска.
На крајот од објавата таа ја цитира Еленор Рузвелт:
„Големите умови дискутираат за идеи; просечните умови разговараат за настани; малите умови разговараат за луѓето.“
Претходно, претседателот на СДСМ, Венко Филипче, изјави дека органите и телата на партијата следната недела ќе дискутираат за учеството на Петровска на настанот „Разговори за иднината во 12:05“, на кој, покрај неа, учествуваа и членови на СДСМ од различни генерации, активисти, аналитичари, правници и професори.
