Поранешниот министер за надворешни работи Никола Димитров реагираше на случајот со жената која беше снимена како фрла отпад во реката Лепенец, предлагајќи построги казни за ваквото однесување.
Димитров преку објава на „Фејсбук“ посочи дека казната за намерно фрлање отпад во река е прениска и предложи законски измени со кои би се вовела минимална глоба од 1.000 евра, заедно со задолжителна општокорисна работа.
„Првиот инстинкт кога ја видов снимкава ми беше да предложам еден нов граѓански договор: следниот што ќе го фатиме како фрла ѓубре во река – да го фрлиме и него во реката. Но, ајде да бидеме ние големи и да видиме што од ова конструктивно може да излезе“, напиша Димитров.
Димитров потсети дека жената која беше снимена со автомобил „Порше“ е пронајдена и санкционирана, но според него, казната предвидена со Законот за јавна чистота е само 40 евра, односно 20 евра доколку се плати навреме.
„Дваесет евра за намерно да фрлиш ѓубре во река. Навистина е смешно. И трагично“, напиша Димитров.
Како решение, тој предлага измени на членовите 14, 33 и 40 од Законот за јавна чистота и усогласување на членот 134 од Законот за управување со отпадот. Според неговиот предлог, за намерно фрлање отпад во реки, езера и други водни тела би требало да се предвиди минимална глоба од 1.000 евра и задолжителна општокорисна работа, по можност во комуналните служби.
Димитров посочи и дека Законот за управување со отпадот веќе предвидува повисока глоба за физички лица за оставање или фрлање отпад во или покрај водни тела.
Тој упати пофалби и до жената која го снимила случајот, оценувајќи дека со ваквите постапки граѓаните придонесуваат за заштита на јавниот простор и вршат притисок врз институциите да постапуваат.
На крајот, Димитров порача дека наместо ваквите сторители да бидат физички казнувани на начин на кој се пошегува во почетокот на објавата, граѓаните треба да ги снимаат ваквите случаи, а институциите да ги санкционираат.
