Следуваат нови поскапувања, а Мицкоски ги одбива мерките за повисоки плати, тврди СДСМ

СДСМ предупредува на нов бран поскапувања во Македонија и ја обвинува Владата на премиерот Христијан Мицкоски дека не презема мерки за заштита на животниот стандард, зголемување на платите и финансиска помош за граѓаните. Од опозициската партија тврдат дека трошоците за живот од почетокот на годината се зголемиле за 4.000 денари, додека платите не го следат растот на цените.

На денешната прес-конференција, Маја Серафимовска Борозан од СДСМ изјави дека од наредната година се најавуваат нови поскапувања на електричната и топлинската енергија, а дополнителен притисок врз домашните буџети може да предизвика и растот на цените на енергенсите во Европа.

— реклама —

„Секој нов месец има нови поскапувања. Од наредната година се најавуваат и нови покачувања на струјата и парното. Во Европа се предупредува на нов удар поради раст на трошоците за енергија. Многу земји веќе преземаат мерки, само Владата на Мицкоски не прави ништо“, изјави Серафимовска Борозан.

Повикувајќи се на синдикалните пресметки, таа посочи дека минималната потрошувачка кошничка во октомври надминува 70.000 денари, а со вклучена кирија за стан од 60 квадратни метри се приближува до 90.000 денари.

Според СДСМ, околу 180.000 работници земаат месечни плати пониски од 31.200 денари, додека минималната плата останува на околу 26.000 денари.

— реклама —

„Ниту три плати не се доволни да се покријат основните животни трошоци. Македонскиот работник работи цел месец, а платата не му стигнува да преживее“, рече Серафимовска Борозан.

Таа се повика и на економски истражувања според кои, како што наведе, на Македонија би ѝ биле потребни 52 години за да го достигне просекот на Европската Унија во благосостојбата, оценувајќи дека животниот стандард во земјава значително заостанува зад европскиот.

— реклама —

Од СДСМ повторно побараа минималната плата да се зголеми на 600 евра, обвинувајќи дека Владата ги отфрлила нивните предлози за повисоки примања и мерки против поскапувањата.

„И во новиот ребаланс нема повисока минимална плата, нема 600 евра за работниците, нема мерки, нема помош за земјоделците“, изјави Серафимовска Борозан.

Таа упати обвинувања и за задолжувањето на државата, тврдејќи дека за две години јавниот долг бил зголемен за четири милијарди евра. Според неа, високите камати и новите задолжувања ќе претставуваат дополнителен товар за граѓаните и идните генерации.

Серафимовска Борозан ја обвини Владата и за начинот на трошење на буџетските средства, тврдејќи дека наместо за поддршка на граѓаните, парите се насочуваат кон партиски интереси и спорни тендери.

СДСМ бара Владата да ги прифати предложените мерки за зголемување на платите и заштита на животниот стандард, предупредувајќи дека без дополнителна поддршка граѓаните ќе се соочат со уште поголем финансиски притисок.