Поранешниот украински министер за одбрана Михајло Федоров изјави дека претседателот Володимир Зеленски има „прашања на кои мора да одговори“ во врска со корупцијата во украинската власт, по новата истрага за перење пари, која отвори сомнежи за луѓе од неговиот потесен круг.
Федоров, кој минатиот месец беше сменет од функцијата министер за одбрана, за BBC рече дека не сака да претпоставува дали Зеленски знаел за можните злоупотреби, но смета дека претседателот треба јавно да каже што знаел и кога дознал.
„Нека тој одговори на тоа прашање. Верувам дека е подготвен на такви прашања. Негова одговорност е да ни каже на сите дали бил свесен за сето тоа или не“, изјави Федоров.
Тој сепак нагласи дека нема докази дека Зеленски лично е корумпиран.
„За целото време додека работев со него, ниту еднаш не сум добил задача или наредба што би била спротивна на законот или на моето чувство за интегритет“, рече Федоров.
Неговата реакција доаѓа по нова антикорупциска истрага во која, според украинските институции, била откриена шема со повеќе од три милиони долари, наводно користени за плаќање кауција за поранешен министер за енергетика обвинет за перење пари. Во случајот била сменета и висока функционерка од кабинетот на Зеленски.
Федоров, кој беше еден од најпознатите лица на украинската влада поради дигитализацијата и развојот на беспилотните системи, истовремено отвори и политичка тема – одржувањето избори во Украина.
„Демократијата не смее да биде заложник на Путин“, порача тој, додавајќи дека украинското општество не треба да се плаши од разговор за избори и политички реформи.
„Ако не можам да ги споделам моите идеи и отворено да зборувам за нив со сопственото општество, тогаш за што се бориме? Ако изборите никогаш не се одржат, тогаш повеќе не сме демократија“, рече Федоров.
Украина е под воена состојба од почетокот на руската инвазија во 2022 година, поради што изборите се суспендирани. Зеленски, пак, смета дека нивното одржување за време на војна би било огромен ризик и би можело дополнително да ја подели земјата.
Федоров беше сменет минатиот месец, а според извештаите, на неговото заминување му претходеле несогласувања со воениот врв. Неговите поддржувачи потоа протестираа во Киев, барајќи да биде вратен на функцијата.
Тој засега не најавува непосредна политичка кандидатура, но не ја исклучува можноста во иднина да се кандидира и за претседател.
„Сè ќе зависи од тоа колку брзо повторно ќе го покренеме демократскиот изборен процес, колку енергија ќе имам и дали луѓето ќе ми кажат дека можат да ми веруваат“, изјави Федоров.
Поранешниот министер најави и посета на САД, каде што се надева на средба со Илон Маск. Неговата цел е да разговара за натамошна поддршка со Starlink и за можноста технологијата да се користи во поширок опсег во интерес на украинските воени операции.
