Смртоносна сообраќајка кај Радичево: Загина 58-годишен маж, 19-годишник возел со 1,32 промили алкохол

Едно лице загина, а друго е повредено во тешка сообраќајна несреќа што се случила во раните утрински часови на магистралниот пат Струмица–Радовиш, во близина на селото Радичево, Општина Василево.

— реклама —

Според информациите од Министерството за внатрешни работи, несреќата била пријавена на 25 октомври 2026 година, околу 02:00 часот. Во неа учествувале патничко возило „пежо“, со радовишки регистарски ознаки, управувано од 19-годишниот Н.В. од селото Злеово, и возило „мицубиши“, со струмички регистарски ознаки, управувано од 58-годишниот Р.С. од селото Добрејци.

Од здобиените повреди, 58-годишниот возач на „мицубиши“ починал на местото на несреќата. Смртта ја констатирал лекар од Итната медицинска помош.

— реклама —

Во несреќата телесни повреди добил и 36-годишниот сопатник во „мицубиши“, со иницијали Д.А., од селото Дабиле.

— реклама —

На местото на несреќата увид извршиле јавен обвинител и екипа на СВР Струмица. При увидот било утврдено дека 19-годишниот возач на „пежо“ управувал под дејство на алкохол. Алкотестирањето покажало 1,32 промили алкохол во крвта, по што тој бил лишен од слобода.

По наредба на јавен обвинител, телото на починатиот е предадено на обдукција.

Од МВР информираат дека случајот се документира.