Двајца мажи украле дијамантска огрлица вредна 4,3 милиони долари од Музејот за применета уметност (MAK) во Виена, откако со чекан ја скршиле витрината во која била изложена, соопшти полицијата.
Кражбата се случила во четвртокот попладне. Двајцата осомничени влегле во музејот како обични посетители на изложбата „Ремек-дела“, по што ја скршиле витрината и ја земале огрлицата.
Според полицијата, двајцата биле немаскирани, а по кражбата избегале во непознат правец.
Полицијата ја проширила потрагата во околината на музејот и ги прегледува снимките од безбедносните камери од метро-станиците и продавниците во близина. Се испитуваат и дополнителни сведоци.
Украдената огрлица е изработена од платина и украсена со 673 дијаманти со вкупна тежина од 200 карати. Накитот бил направен за египетското кралско семејство.
Огрлицата во 1939 година ја носела египетската кралица Назли на свадбата на нејзината ќерка Фавзија со иранскиот престолонаследник, кој подоцна станал шах Мохамед Реза Пахлави.
Со децении се сметало дека огрлицата е изгубена, сè додека повторно не се појавила на аукција на „Сотби“ во 2015 година. Тогаш била продадена за 4,3 милиони долари.
Полицијата објавила и фотографии и опис на осомничените. Станува збор за двајца мажи високи меѓу 170 и 175 сантиметри, со слаба градба, темна коса и темна брада. Носеле црна горна облека и темни патики со бели ѓонови.
Во инцидентот никој не бил повреден.
Музејот соопшти дека ќе остане отворен, со исклучок на делот од изложбата каде што се случила кражбата. Оттаму најавија дека тој дел наскоро повторно ќе биде достапен за посетителите.
