Со лажни извештаи при регистрација на возила извлечени 6,8 милиони денари од државниот буџет

Единицата за финансиски криминал при Министерството за внатрешни работи поднела кривична пријава против 47-годишен скопјанец и правно лице од Скопје, поради сомневања за проневера во службата и перење пари. Според МВР, со изготвување лажни извештаи за надоместоци при регистрација на возила била остварена противправна имотна корист од 6.803.900 денари на штета на државниот буџет.

На 15 октомври 2026 година, Единицата за финансиски криминал при Секторот за криминалистички истраги, во рамки на Одделот за сузбивање на организиран и сериозен криминал, поднела кривична пријава до Основното јавно обвинителство за гонење организиран криминал и корупција против И.С. (47) од Скопје. Тој се сомничи за „проневера во службата“ и „перење пари и други приноси од казниво дело“, додека правното лице е пријавено за перење пари.

— реклама —

Според пријавата, И.С., во својство на овластено лице во правното лице кое имало овластување за вршење технички прегледи на возила, во периодот од 1 јануари 2021 до 20 јануари 2026 година изготвувал и доставувал лажни извештаи за наплатените надоместоци при регистрација на возила.

— реклама —

Извештаите биле доставувани до Јавното претпријатие за државни патишта, Црвениот крст, Републичкиот совет за безбедност на сообраќајот на патиштата, Министерството за животна средина и општините. Со ваквите дејствија, според МВР, осомничениот прибавил противправна имотна корист од 6.803.900 денари.

Лажирањето на податоците, како што наведува полицијата, било вршено во содејство со лицето С.С. Двајцата, според пријавата, биле овластени за изготвување и потпишување фактури и доставување извештаи до надлежните институции.

— реклама —

За прикривање на паричните средства, тие наводно користеле две правни лица и осигурително-брокерско друштво од Скопје, на чии сметки биле уплаќани наплатените надоместоци. Парите потоа биле префрлани од една на друга сметка и мешани со приходите од редовното работење, преку различни финансиски трансакции.

Меѓу наведените начини за прикривање на потеклото на средствата се позајмици, договори за заедничка изградба и купопродажба на недвижности, купопродажба на возила и други преноси на пари. Дел од средствата, според МВР, биле користени за купување недвижен и подвижен имот во корист на пријавеното правно лице.

Од полицијата наведуваат дека со пријавените дејствија буџетот на Македонија бил оштетен за 6.803.900 денари.