Екипата на Шкендија Арачиново обезбеди историски пласман во Првата македонска фудбалска лига, откако денеска по драматична пенал-серија го елиминира ФК Пелистер во баражот, одигран во Кавадарци.
Херој на натпреварот беше голманот Столевски, кој блескаше меѓу стативите. Тој одбрани дури три удари во пенал-рулетот, а претходно, во текот на натпреварот, му одбрани и пенал на Ивановски.
По последниот пенал следуваше голема радост кај фудбалерите и стручниот штаб на тимот од Арачиново. Во славјето на теренот можеше да се забележи и македонско знаме, имајќи предвид дека во составот на Шкендија настапуваат и повеќе македонски фудбалери.
Покрај Шкендија Арачиново, денеска пласман во елитното друштво обезбеди и ФК Скопје, додека ФК Брегалница претходно, како првопласирана екипа, го завери враќањето во Првата лига.
