Од денеска, нискобуџетната авиокомпанија „Виз ер“ (Wizz Air) воведува пет нови линии кои ќе ги поврзат македонските патници со неколку европски метрополи – Бари, Стокхолм, Мадрид, Ларнака и Базел. Новите рути ќе оперираат од Меѓународниот аеродром Скопје и од аеродромот „Св. Апостол Павле“ во Охрид на 27 и 28 октомври, соопштуваат од ТАВ Македонија.
„Многу сум среќен што денес, на почетокот на зимската сезона, пет нови авиолинии започнуваат од двата аеродроми — во Скопје и во Охрид. Секако, со поддршка на Владата и благодарение на посветеноста на Виз ер. Сигурен сум дека овие пет дестинации ќе бидат многу посетени и сакам да нагласам дека се избрани токму според желбите на патниците кои со нетрпение очекуваа да бидат поврзани со овие градови. Благодарен сум и на тимот на ТАВ Аеродроми кој ја даде својата поддршка за подготовката на овие линии. Верувам дека патниците ќе уживаат во новите дестинации, а ние не запираме тука — посветени сме да обезбедиме уште повеќе линии од двата македонски аеродроми,“ изјави генералниот директор на ТАВ Македонија, Неџат Курт.
Новата линија Скопје – Стокхолм започна утрово во 6:05 часот, со лет до главниот аеродром во шведската престолнина – Арланда. Првиот лет на рутата Скопје – Бари ќе се реализира денеска во 14:40 часот, додека од Охрид првиот авион за Базел полета напладне.
Утре, на 28 октомври, ќе стартува и линијата Скопје – Мадрид, со прв лет во 16:05 часот. Истовремено, ќе се обнови и линијата Скопје – Ларнака, со лет што ќе пристигне од Кипар во 7:15 часот.
Летовите кон Стокхолм, Бари и Базел ќе се одвиваат двапати неделно — секој понеделник и петок. Линијата Скопје – Мадрид ќе сообраќа секој вторник, петок и сабота, а Скопје – Ларнака — вторник и сабота.
Од ТАВ Македонија очекуваат голем интерес за новите рути, бидејќи сите пет градови се меѓу најбараните туристички дестинации во Европа.
Од петте нови линии, Мадрид и Бари се целосно нови дестинации за македонскиот пазар — главниот град на Македонија за првпат ќе има директна врска со шпанската престолнина и со италијанскиот крајбрежен град. Ларнака и Базел се повторно воспоставени линии, додека Скопје – Стокхолм е нова рута што ќе се реализира до главниот аеродром Арланда.
