Портпаролот на ВМРО-ДПМНЕ, Валентин Манасиевски, на денешната прес-конференција упати остри критики кон лидерот на СДСМ, Венко Филипче, обвинувајќи го дека ја продолжува политиката на отстапки која, според владејачката партија, била карактеристична за претходните раководства на СДСМ.
На прес-конференција, Манасиевски оцени дека низ историјата СДСМ стоел зад одлуки кои, според него, биле на штета на националните интереси, наведувајќи ги промената на името, знамето и Уставот како примери за такви политики.
Тој тврдеше дека актуелното раководство на СДСМ е подготвено на нови отстапки поврзани со прашања кои се однесуваат на македонскиот идентитет, историја и јазик.
Манасиевски посочи дека во време кога, според него, Македонија добива позитивни оценки за реформите и економскиот развој, Филипче и СДСМ продолжуваат да инсистираат на уставните измени како приоритет.
Во своето обраќање, портпаролот на ВМРО-ДПМНЕ постави прашање за мотивите на лидерот на СДСМ и оцени дека наместо да ги брани националните позиции, тој застапува политики кои не се во интерес на државата.
Манасиевски исто така порача дека граѓаните на претходните избори јасно ја казниле политиката на СДСМ, поради што партијата денес се наоѓа во опозиција.
