Со токсична боја ја разубавувале храната во градинка, отруени повеќе од 200 деца и вработени во Кина

Сопственичка на градинка во кинеската покраина Гансу е осудена на доживотен затвор откако повеќе од 200 деца и вработени биле затруени со храна загадена со олово. Затворски казни добиле и петмина други вработени во установата.

Ли Хуифанг, која раководела со градинката „Хекси Пеисин“ во градот Тјаншуи, е прогласена за виновна за производство и продажба на токсична и штетна храна. Судот во Ланџоу наредил и конфискација на нејзиниот имот, проценет на 500.000 јуани, односно околу 66.500 евра, објави кинеската државна телевизија CCTV.

— реклама —

Извршниот директор на градинката, Џи Џинглин, е осуден на 15 години затвор и парична казна од 300.000 јуани, што изнесува околу 40.000 евра. Четворица вработени во кујната добиле затворски казни од шест до осум години.

Според судските наоди, вработените користеле боја што не е наменета за човечка исхрана за да го подобрат изгледот на оброците и да привлечат повеќе деца во градинката, иако на производот јасно било наведено дека не смее да се користи за исхрана.

— реклама —

Случајот бил откриен во јули 2025 година, кога било утврдено дека 247 деца и вработени имаат невообичаено високо ниво на олово во крвта. Истрагата започнала откако 235 деца побарале медицинска помош поради труење со олово, откако јаделе колачи од црвени урми подготвени на пареа, како и печива со колбаси и пченка.

Лабораториските анализи покажале дека колачите содржеле 1.052 милиграми олово на килограм, а печивата 1.340 милиграми на килограм. Тоа е повеќе од 2.000 пати над кинеската дозволена граница за безбедност на храната, која изнесува 0,5 милиграми на килограм.

— реклама —

Судот утврдил дека сопственичката и директорот им наредиле на вработените да додаваат токсични и штетни супстанции во храната што им се служела на децата и на персоналот.

Истрагата открила и дека десетици локални функционери и вработени во болница се обиделе да го прикријат случајот, меѓу другото, со манипулирање со резултатите од крвните анализи и примање поткуп од еден од инвеститорите во градинката, пренесе Танјуг.

Светската здравствена организација предупредува дека труењето со олово е особено опасно за малите деца, бидејќи може да предизвика сериозни оштетувања на мозокот и централниот нервен систем.

По инцидентот, Кина донела национални упатства за исхраната во образовните установи. Новите мерки предвидуваат задолжително испитување на секоја нова пратка храна, како и набавка на брашно, ориз и масло за јадење исклучиво преку централизирани набавни центри.