ВМРО-ДПМНЕ преку соопштение направи споредба на економските показатели од периодот на владеење на СДС и ДУИ со резултатите од првите 23 месеци на актуелната Влада тврди дека платите и пензиите растат значително побрзо.
Од партијата посочуваат дека просечната плата во периодот од јули 2024 до мај 2026 година се зголемила за 8.583 денари – од 40.961 на 49.544 денари. Тоа, според нивната пресметка, претставува просечен месечен раст од околу 373 денари.
За споредба, ВМРО-ДПМНЕ наведува дека од јуни 2017 до мај 2024 година просечната плата пораснала од 22.808 на 41.252 денари. Во период од 84 месеци, тоа е зголемување од 18.444 денари, односно околу 220 денари месечно.
Од партијата ја нагласуваат и разликата кај старосните пензии. Просечната старосна пензија, според наведените податоци, во јуни 2017 година изнесувала 15.273 денари, а во мај 2024 година достигнала 22.937 денари. Тоа е зголемување од 7.664 денари за седум години, односно просечно околу 91 денар месечно.
Во јули 2024 година, пак, просечната старосна пензија изнесувала 22.858 денари, додека во мај 2026 година достигнала 29.663 денари. Така, за 23 месеци пензијата се зголемила за 6.805 денари, или во просек за околу 296 денари месечно.
ВМРО-ДПМНЕ оценува дека овие податоци покажуваат оти во периодот на актуелната Влада платите растат за околу 70 проценти побрзо, а старосните пензии за 325 проценти побрзо на месечно ниво во споредба со периодот што го посочува партијата како владеење на СДС и ДУИ.
Од партијата велат дека разликите меѓу економските политики на двете влади се мерливи преку конкретните показатели и дека растот на приходите треба да придонесе за повисок животен стандард и поголема економска сигурност на граѓаните.
„Граѓаните заслужуваат економски раст што се чувствува во секое семејство“, наведуваат од ВМРО-ДПМНЕ, додавајќи дека нивниот фокус останува на повисоки плати и пензии, економски раст и подобар стандард.
