Собранието го усвои Законот за судска служба, кој претставува едно од клучните реформски законски решенија во правосудниот сектор и е усогласен со Реформската агенда и Развојната секторска стратегија за правосудство 2024–2028 година, соопшти Министерството за правда.
Со новото законско решение се надминуваат долгогодишните слабости во функционирањето на судската служба и се создаваат услови за поефикасна работа на судовите, преку јасно дефинирање на улогата и статусот на судските службеници.
Една од најзначајните новини е тоа што судските стручни службеници добиваат статус на посебни административни службеници, односно стануваат посебна категорија вработени во судската власт со сопствен законски режим.
Законот предвидува и нов систем за класификација на работните места, како и посебна постапка за вработување и унапредување, која ќе вклучува административна селекција, испит и интервју, со цел избор на најстручни кадри за судовите.
Дополнително, значително се зајакнува институционалната независност на судската власт. Судскиот буџетски совет ќе има централна улога во кадровското планирање, без потреба од претходна согласност од извршната власт.
Со законот се воведува и нов систем на плати, при што зголемувањата предвидени со колективните договори ќе станат составен дел од основната плата, со што ќе се обезбеди постабилен и попредвидлив систем за вреднување на трудот.
Прецизно се уредува и статусот на судската полиција, чии припадници добиваат бенифициран работен стаж, како и статусот на останатите категории вработени во судовите.
Од Министерството за правда оценуваат дека со донесувањето на Законот за судска служба се реализира уште една значајна обврска од Реформската агенда и се прави крупен чекор кон изградба на независно, професионално и ефикасно правосудство.
