Турски суд го осуди претседателот на фудбалскиот клуб Фенербахче, Садетин Саран на две и пол години затвор поради поттикнување нелегално обложување.
Според пресудата на судот во Истанбул, Саран и неговиот брат Кенан Саран биле прогласени за виновни за „поттикнување лица да учествуваат во нелегално обложување преку рекламирање или други средства“.
Садетин Саран ги отфрлил обвинувањата и за време на судскиот процес тврдел дека не сторил никакво кривично дело.
Пресудата доаѓа само неколку дена пред вонредниот конгрес на Фенербахче, на кој треба да биде избран негов наследник на челната позиција во клубот.
Саран претходно оваа година кратко време беше приведен и во рамки на поширока истрага за употреба на наркотични средства меѓу познати личности во Турција, но подоцна беше ослободен.
По скандалот тој најави повлекување од функцијата, а клубот во март соопшти дека на 6 и 7 јуни ќе одржи вонредно собрание за избор на ново раководство.
Турските власти во изминатиот период спроведуваат обемни истраги за наводно местење натпревари и нелегално обложување во професионалниот фудбал.
Како дел од акциите, десетици судии беа суспендирани од страна на Турската фудбалска федерација, а повеќе коментатори, функционери и фудбалери беа приведени или уапсени.
