Судскиот процес против Владимир и Миљана Кецмановиќ, родителите на момчето кое го изврши масакрот во основното училиште „Владислав Рибникар“ во Белград, влезе во завршна фаза, а првостепената пресуда треба да биде објавена на 18 јуни.
Обвинителството побара максимални казни, оценувајќи дека родителите сносат кривична и морална одговорност поради занемарување на детето и овозможување пристап до оружје.
За време на завршните зборови во судницата беа обелоденети досега непознати детали од семејниот живот на момчето. Меѓу нив беа прочитани и пораки од комуникацијата меѓу него и неговата мајка, Миљана Кецмановиќ.
Според изнесеното, уште во 2020 година момчето ѝ напишало на мајка си: „Те мразам“, на што таа одговорила: „Во училиште сум, немој да ме срамиш, јас сум ти мајка, треба да се гордееш со мене“. Неколку дена подоцна му испратила порака: „Е*и се, сине“.
Адвокатите посочија и дека ноќта пред масакрот момчето на интернет гледало експлицитни содржини, додека во собата со него била и неговата помлада сестра, нагласувајќи дека родителите немале контрола врз неговото однесување.
Судницата ја потресоа и сведоштвата на семејствата на жртвите. Адвокатот на семејството Мартиновиќ го прочита писмото на сестрата на убиената Катарина, во кое стои: „Таа понесе бисквити, тој куршуми. Ми ја одзедовте сестрата. Не се залажувајте, виновни сте“.
Мајките на убиените деца порачаа дека процесот не е обид да се врати минатото, туку борба за иднината и за спречување вакви трагедии да се повторат.
Адвокатите на оштетените семејства оценија дека родителите не покажале чувство на одговорност, посочувајќи дека детето не се раѓа како злосторник, туку дека околностите и воспитувањето имаат клучна улога во неговото формирање.
