Нова полициска операција околу електроенергетска инфраструктура е во тек во Германија, откако се појавиле „сомнителни околности“ во трафостаница во Гандеркезе, во округот Олденбург. Според информациите на „Билд“, специјализирани полициски единици го опколиле објектот, а поширокото подрачје е блокирано за сообраќај.
На терен е присутен и полициски хеликоптер, кој го надлетува подрачјето, додека екипи на Сојузната агенција за техничка помош го осветлуваат просторот со рефлектори. Полицијата засега не открива што точно предизвикало интервенција, освен што станува збор за сомнителни околности.
Засега нема информации дека избувнал пожар или дека е предизвикана материјална штета. Интервенцијата продолжува, а надлежните треба да утврдат што се случувало во и околу објектот.
Случајот повторно го насочува вниманието кон безбедноста на германската електроенергетска мрежа. Во четвртокот во Дормаген, во Северна Рајна-Вестфалија, минувач пријавил сомнителни направи во близина на трафостаница. Полицијата се сомнева дека можело да станува збор за обид за саботажа.
Според досегашните наоди на истражителите, направите можеби биле поставени со намера да предизвикаат краток спој. Надлежните располагаат и со писмо во кое се презема одговорност, а кое се однесува и на слични инциденти во Бергхајм и Јеншвалде.
„Билд“ објави дека пронајдените направи наликуваат на конструкции што биле користени и во претходни случаи. Поради тоа, истражителите проверуваат дали зад повеќе инциденти стои ист сторител или иста група.
Се испитува и можната поврзаност меѓу актуелната полициска интервенција во Гандеркезе, во Долна Саксонија, и сомнителните случувања во Дормаген. Засега, сепак, нема потврда дека двата случаи се поврзани.
