Седум години по апсењето на Игор Југ за настаните од 27 април 2017 година, неговата сопруга Ивана порача дека семејството и понатаму ќе бара одговори и правда за случајот.
Во објава на социјалните мрежи, таа се потсети на 21 септември 2017 година, кога во раните утрински часови Југ бил уапсен, посочувајќи дека токму тогаш започнал тежок период за нивното семејство.
„Поминаа години исполнети со неизвесност, болка и борба. Веќе година и пол Игор не е со нас, а случајот сè уште не е решен. Одговори нема, правда нема! Оваа тишина и неизвесност тежат повеќе од сè, секој ден одново“, напиша Ивана Југ.
Таа додава дека, и покрај болката, семејството нема да се откаже од барањето на вистината.
„Живееме со оваа тежина и не престануваме да ја бараме вистината. Затоа што Игор не е само спомен – тој е дел од нас, дел што никогаш нема да згасне. Овој ден не е само потсетник на еден настан, туку на една неправда што сè уште трае. И колку и да е тешко, нема да престанеме да бараме правда. За него. За нас. За вистината“, порача таа.
Ивана Југ наведува и дека последиците од целиот период оставиле трага врз повеќе семејства.
„Оваа голгота удри печат на многу семејства и многу животи засекогаш ги запечати“, вели таа.
Игор Југ беше уапсен во врска со настаните во Собранието од 27 април 2017 година, а подоцна беше осуден на 12 години затвор.
По изрекувањето на пресудата, Југ ја коментираше казната, меѓу другото, велејќи дека никогаш не ги предал својата татковина и семејството.
Југ почина на 7 февруари 2025 година, на 54-годишна возраст, во својот дом. Тој беше пуштен од затвор поради нарушено здравје. Почина на денот на седмиот роденден на неговата ќерка.
