Градоначалничката на Град Скопје, Данела Арсовска, не го поштеди претседателот на Советот, Трајко Славески. Нивната кавга се преточува и во обвинувања за лична основа. Според неа, советничката Ирена Витина, која во ноември лани го напушти ВМРО-ДПМНЕ и остана да дејствува како независна советничка во Советот на Скопје се онесвестила поради наводни брутални напади.
„Мизогеното и дивјачко однесување на Трајко Славески како претседател на Советот во Град Скопје на вчерашната седница кулминираше со немил настан во кој советничката Ирена Витина ја загуби свеста не можејќи повеќе да се носи со постојаните брутални напади кон неа од страна на Славески. Витина е жена која лавовски се бори на секоја седница единствено за интересите на скопјани и поради фактот што препозна некој единствено е заинтересиран за теснопартиски и лични интереси се повлече од советничката група. Витина покажа срце и храброст и ако сите од раководството на ДПМНЕ се однесуваа како Витина кога станува збор за интересите на граѓаните партијата досега ќе беше на власт.
Ако ДПМНЕ ваков притисок вршеше кон власта како кон Витина одамна ќе беа на власт. Наместо борба со власта, тие продолжуваат со правење на поделби во опозициското ткиво. За ваквото нивно однесување можно е само едно сценарио, а тоа е да се во директен договор со власта кој има за единствена цел Христијан Мицкоски да го задржи своето министерско место како министер за опозиција.
Да не заборавиме дека вчера ВМРО-ДПМНЕ го блокираше Собранието за наводните бакнежи на Маричиќ упатени кон пратеничката Стојановска, но не го стори тоа кога се менуваше Кривичниот законик кога се менуваше името и во Собранието се гласаа низа на катастрофални решенија за македонскиот народ. Со кој образ Мицкоски, Славески и останатото раководство на партијата говорат за мизогенија ако вчера нивното однесување резултираше со хоспитализација на една жена која е мајка на две деца“. напиша Арсовска.