Фудбалските репрезентации на Шпанија и Белгија денеска ќе се обидат да ги поправат впечатоците по разочарувачкиот старт на Светското првенство, бидејќи нов кикс сериозно би ги загрозил нивните амбиции за пласман во нокаут-фазата.
Шпанија од 18 часот на стадионот „Мерцедес-Бенц“ во Атланта ќе се соочи со Саудиска Арабија во натпревар од второто коло. Избраниците на Луис де ла Фуенте не успеаја да го скршат отпорот на Зеленортските Острови во првото коло, играјќи без голови, па денешниот натпревар е можност за враќање на победничките патеки.
Од шпанскиот табор се очекува многу повеќе, а надежите повторно ќе бидат насочени кон младата ѕвезда Ламин Јамал и Феран Торес. Сепак, Саудиска Арабија покажа дека не смее да биде потценета, откако во првото коло одигра 1:1 против Уругвај и остана во игра за пласман понатаму.
Шпанија влегува како фаворит, имајќи ги предвид и претходните три меѓусебни дуели во кои славеше против Саудијците.
Во вечерниот термин, од 21 часот, Белгија ќе игра против Иран на стадионот „СоФај“ во Лос Анџелес. Белгијците исто така разочараа на стартот, откако ремизираа со Египет, а единствениот гол го постигна Ромелу Лукаку.
„Црвените ѓаволи“ се под силен притисок, особено поради фактот што немаат победа на последните три натпревари и сакаат да го избегнат сценариото од Светското првенство во Катар во 2022 година, кога беа елиминирани уште во групната фаза.
Иако има 34 години, Кевин де Брујне и натаму се смета за клучен играч во белгискиот состав, кој е голем фаворит против Иран.
Иранците, пак, во првото коло ремизираа 2:2 против Нов Зеланд и со добра самодоверба го очекуваат дуелот со Белгија. Сепак, поради актуелните тензии со САД, иранската репрезентација е сместена во Мексико и на денот на натпреварите патува до местото на одигрување, што претставува дополнителен предизвик за селекцијата.
