По завршувањето на прославата по повод 35 години независност на Македонија, остануваат низа прашања за начинот на кој биле обезбедени, одобрени и распределени средствата за концертите и останатите настани. На седницата за пратенички прашања, Оливер Спасовски од СДСМ побара детални информации за трошењето на вкупно 5,53 милиони евра.
Според податоците што ги изнесе, 300 милиони денари биле обезбедени од Државна лотарија, додека дополнителни 40 милиони денари биле обезбедени од општествено одговорни компании.
Спасовски побара да се објават документите со кои се утврдува намената на средствата, како и одлуката со која било одобрено користењето на 300 милиони денари од нераспределената добивка на Државна лотарија од 2024 година.
Тој посочи дека Владата со заклучок од својата 167. седница ѝ укажала на Државна лотарија да обезбеди средства и да објави јавен повик за реализација на настаните, но оцени дека самиот владин заклучок не претставува одлука за распределба на добивката.
„Кој предложил користење на добивката, кој ја утврдил намената, кој е овластен тоа да го направи, да ги видиме датумите кога е носена таа одлука?“, праша Спасовски.
Пратеникот се осврна и на постапката за избор на организаторот. Како што наведе, јавниот повик бил отворен само пет дена и пристигнала една понуда. Повикот завршил на 8 мај, а на 12 мај јавноста веќе била информирана дека Дејвид Гета ќе настапи на прославата.
Спасовски побара да се објават понудата и целокупната документација поврзана со изборот, како и да се расчистат евентуалните дилеми за судир на интереси.
Посебно прашање, според него, е кои лица учествувале во изборот, а потоа биле ангажирани во реализацијата на програмата. Тој побара и прецизни информации за договорните и финансиските односи со „Стардаст“ и „Авалон интернешнал“.
Дополнително, Спасовски праша дали се пресметани и платени сите даноци поврзани со организацијата на прославата, колкав е платениот износ и кои компании ги обезбедиле дополнителните 600 илјади евра.
„Кои износи ги дале? Кога се направени уплатите, кои се примателите на средствата и да ми се појасни дали ова е спонзорство или е донација“, праша Спасовски.
На прашањата одговори заменик-министерот за финансии Николче Јанкуловски, кој рече дека Владата е горда на начинот на кој била одбележана 35-годишнината од независноста.
Јанкуловски оцени дека станувало збор за масовно посетени настани и посочи дека раководството на Државна лотарија веќе дало одговори на прашањата поврзани со финансирањето.
„Ако имате какво било сомневање дека има нерегуларност во финансирањето и постапката, ако ви смета нешто во тој дел, обратете се до надлежни органи, тела, поставете ги прашањата, па ќе ги добиете соодветните одговори“, рече Јанкуловски.
Тој додаде дека одлуката за одвоените средства била донесена од надлежен орган во Државна лотарија, по постапување на Владата.
Спасовски, сепак, го оспори ваквото објаснување, повикувајќи се на член 38 од Законот за трговски друштва. Според него, распределбата на добивката треба да се врши врз основа на одлука на Собранието на друштвото, на предлог на Управниот одбор и во согласност со годишната сметка.
Тој посочи дека кај Државна лотарија Собранието на акционери го претставува Владата и побара да се каже дали таква седница била одржана и дали била донесена одлука за користење на 300 милиони денари.
„Ако е одржано собрание на акционери во присуство на нотар и е донесена таква одлука, зошто се крие тоа од јавноста?“, праша Спасовски.
Тој оцени дека целосното објавување на документите, понудите, договорите и финансиските податоци би овозможило да се расчистат прашањата околу начинот на кој биле потрошени средствата за прославата.
