Денеска министерот за внатрешни работи Оливер Спасовски оствари онлајн состанок со директорката на Европската канцеларија за поддршка во областа на азилот (ЕАСО), Нина Грегори, чија цел беше да се дискутира за активностите кои Европската канцеларија за поддршка во областа на азилот ги спроведува во рамките на регионалниот ИПА проект „Регионална поддршка на управувањето со сензитивната миграција во делот на Западен Балкан и Турција“, проект на кој Министерството за внатрешни работи е еден од крајните корисници. За време на состанокот беа разгледани резултатите од досегашната соработка која ја има Министертвото со оваа агенција на Европската Унија, како и идните чекори во спроведувањето на активностите во рамките на проектот.
Министерот Спасовски го изрази своето задоволство од досега имплементираните активности и напомена дека од особено значење е континуираната поддршка и соработката која Европската канцеларија за поддршка во областа на азилот во изминатите неколку години ја овозможува за Министерството за внатрешни работи. Притоа, беше констатирано дека во рамки на регионалниот ИПА проект, со поддршка на партнерите од ЕАСО, беа спроведени и голем број на обуки, со кои се подобри работењето на вработените во министерството.
Исто така, беше изразено задоволство од успешното спроведување на Патоказот подготвен во рамките на фазата 1 од регионалниот проект, особено имајќи превид дека Република Северна Македонија, покрај Република Србија, е единствената земја во регионот која има Патоказ за соработка со Европската канцеларија за поддршка во областа на азилот. Оттука и големиот ентузијазам со кој беше пристапено при консултациите во однос на вториот Патоказ за соработка помеѓу Република Северна Македонија и ЕАСО, кој е за периодот 2020-2022.
На крајот од состанокот министерот Спасовски изрази голема благодарност за поддршката која Европската канцеларија за поддршка во областа на азилот ѝ ја дава на Република Северна Македонија на нејзиниот пат кон исполнување на европските стандарди кои ќе придонесат кон членство во европското семејство.
