Голема полициска операција од рано утрово се спроведува во Прилеп и околината, дознава неофицијално „Скопје1“ од извори запознаени со истрагата. Според нашите информации, полициски претреси и проверки се вршат на околу 30 локации, а во истрагата се опфатени и полициски службеници.
На терен се распоредени поголем број полициски службеници, меѓу кои припадници на специјалните единици и униформираната полиција. Операцијата ја спроведува Министерството за внатрешни работи преку Бирото за јавна безбедност и, според неофицијалните сознанија на „Скопје1“, е дел од поширока истрага за сомнителна организирана криминална структура.
Извори на „Скопје1“ посочуваат дека истрагата е поврзана со сомневања за активности со наркотични средства.
Под лупа на истражните органи, според нашите неофицијални информации, се и лица од полициските структури. Се проверуваат сомневања за нивна можна поврзаност со лица или активности кои се предмет на истрагата.
Од раните утрински часови засилено полициско присуство е видливо на повеќе точки во Прилеп, а претресите и проверките се спроведуваат на локации во градот и во поширокото подрачје.
Полициската операција сè уште е во тек, поради што засега нема целосни информации за бројот на приведени или осомничени лица, ниту за тоа што е пронајдено при претресите.
„Скопје1“ очекува официјални информации од надлежните институции по завршувањето на акцијата.
