Фудбалерите на Иран и Нов Зеланд приредија вистинска драма на Светското првенство, одигрувајќи нерешено 2-2 во еден од највозбудливите натпревари досега на турнирот.
Нов Зеланд одлично го отвори мечот и поведе уште во седмата минута преку Ели Џаст. Иранците брзо се консолидираа и почнаа да притискаат, а најблиску до израмнување беше Мехди Тареми во 23. минута. Иницијативата конечно вроди со плод во 32. минута, кога Рамин Резаејан погоди за 1-1.
Во второто полувреме повторно блесна Џаст, кој со својот втор гол ѝ донесе нова предност на селекцијата на Нов Зеланд. Сепак, Иран не се предаде, па Мохамад Мохеби во 64. минута ги постави конечните 2-2.
Претходно, уште еден натпревар на Светското првенство заврши без победник, откако Саудиска Арабија и Уругвај ремизираа со резултат 1-1.
