Европската агенција за безбедност на храната (ЕФСА) оцени дека употребата на засладувачот аспартам-ацесулфам (Е 962) како прехранбен додаток не претставува ризик за здравјето, но заклучокот на европската агенција беше остро оспорен од неколку независни невладини организации.
Засладувачот е одобрен за употреба во бројни намирници и пијалаци без шеќер или со намалена енергетска вредност, меѓу кои се газирани пијалаци и јогурти. По внесувањето во организмот, Е 962 се разложува на аспартам и ацесулфам К.
Експертскиот панел на ЕФСА не утврдил причини за загриженост во однос на начинот и количините во кои во моментов се користат ацесулфам К (Е 950), аспартам (Е 951) и солта аспартам-ацесулфам (Е 962).
Заклучокот се темели на прифатливиот дневен внес на аспартам од 40 милиграми на килограм телесна тежина, кој повторно е потврден, како и на неодамна ревидираниот прифатлив дневен внес на ацесулфам К од 15 милиграми на килограм телесна тежина.
Според ЕФСА, проценетата изложеност на овие засладувачи кај сите возрасни групи и натаму е под утврдените граници.
Сепак, невладините организации „Фудвоч“, „Јука“ и Лигата против ракот го оценија мислењето на ЕФСА како „скандалозно“. Тие тврдат дека европската агенција ги занемарува здравствените ризици поврзани со аспартамот, повикувајќи се на понови независни научни истражувања.
Организациите соопштија дека повеќе од 400.000 луѓе во Европа ја потпишале нивната петиција со која се бара превентивна забрана на аспартамот во Европската Унија.
Тие потсетуваат дека во 2023 година Меѓународната агенција за истражување на ракот, која дејствува во рамките на Светската здравствена организација, го класифицираше аспартамот како „можно канцероген за луѓето“, врз основа на анализа на достапната независна научна литература.
