Шведскиот стриминг-гигант Spotify официјално ја пушти во употреба новата опција за аудио-статии, продолжувајќи со проширување на својата понуда надвор од музиката и подкастите.
Корисниците на платформата отсега ќе можат да слушаат аудио-верзии од ексклузивни текстови на некои од најпознатите светски списанија, меѓу кои Vogue, The Atlantic и Variety.
Во првата фаза, Спотифај ќе понуди повеќе од 650 подолги статии на англиски јазик за корисниците кои веќе имаат пристап до аудио-книги.
За разлика од класичните интернет-вести, кои најчесто имаат меѓу 200 и 500 зборови и се читаат за неколку минути, овие текстови содржат од 2.000 до над 10.000 зборови. Нивното читање трае од 15 минути до еден час, додека аудио-верзиите можат да достигнат и до два часа.
Новата услуга е поврзана со моделот на претплата. Премиум корисниците ќе имаат директен пристап до аудио-статиите во рамки на нивниот месечен лимит за слушање аудио-книги.
Од друга страна, корисниците без претплата ќе можат поединечно да купуваат аудио-статии по цена од 1,99 долари.
Овој потег доаѓа во период кога Спотифај бара нови начини за зголемување на ангажманот на корисниците и зацврстување на лидерската позиција на пазарот.
Компанијата се соочува со растечка конкуренција од генеративни АИ музички стартапи, но и од традиционални ривали во сферата на видеото и подкастите, како што се YouTube и Netflix.
