Спречена опасност во Хром: Од канализациски колектор извадени теписи, облека и завеси

Голема количина отпад, меѓу кој теписи, черги, остатоци од влажни марамчиња, облека, завеси и работна облека, била извадена од канализацискиот колектор на улицата Воин Драшкоци во населбата Хром.

За случајот информираше градоначалникот на Општина Ѓорче Петров, Александар Стојкоски, кој посочи дека навремената реакција спречила можна катастрофа.

— реклама —

„За среќа, овој пат навреме беше откриен проблемот и се реагираше во исклучително тешки услови. Ѓорче е безбедно“, објави Стојкоски.

Тој упати критики до несовесните граѓани кои фрлаат несоодветен отпад во канализацискиот систем, нагласувајќи дека ваквите предмети не завршиле таму сами од себе.

— реклама —

„Овој отпад не се нашол сам во системот за канализација. Луѓе, наши соседи, пријатели, познаници – ова е од некој меѓу нас“, порача градоначалникот.

— реклама —

Стојкоски предупреди дека фрлањето теписи, текстил и друг несоодветен отпад во канализацијата може да предизвика сериозни проблеми и повика на поголема свест и одговорност кај граѓаните.

„Памет за друг пат!“, порача тој.