Срам за Скопје – Букефал со пет нозе на билбордот на Орце Ѓорѓиевски, велат од СДСМ

СДСМ остро реагираше на новото обележје на влезот во Скопје, обвинувајќи ги ВМРО-ДПМНЕ и градоначалникот Орце Ѓорѓиевски дека наместо достоинствено претставување на главниот град, поставиле визуелно решение кое, според партијата, претставува „симбол на аматеризам и срам“.

Од СДСМ посочуваат дека на билбордот Букефал е прикажан со пет нозе, а ликот на воинот, според нив, наликува на цртан лик.

— реклама —

„Резултатот е срамен: коњот Букефал е насликан со пет нозе, воинот наликува на лик од цртан филм, а целата слика е генеричка и без никаква врска со реално Скопје“, се наведува во соопштението.

Партијата оценува дека ова не е првпат ВМРО-ДПМНЕ, според нив, да го нарушува изгледот на главниот град, потсетувајќи на проектот „Скопје 2014“.

— реклама —

„Познато е дека токму ВМРО, преку проектот „Скопје 2014“, го обезличи градот со стотици споменици, фасади од стиропор и лавови кои немаа никаква историска или естетска вредност“, наведува СДСМ.

Во реакцијата се тврди дека наместо инвестиции во инфраструктура, јавен превоз и уредување на градот, локалната власт се фокусира на кампањи.

— реклама —

„Наместо реални резултати, ВМРО-ОКГ и Орце постојано прават кампањи. Сè е кампања, а резултати нема“, наведува СДСМ.

Од партијата оценуваат и дека поставувањето на вакво обележје во екот на туристичката сезона испраќа лоша слика за главниот град.

„Наместо да се покаже уреден и достоинствен град, туристите на влезот во Скопје добиваат слика која повеќе наликува на лоша шега отколку на репрезентација на главниот град“, стои во реакцијата.

СДСМ порачува дека Скопје заслужува повеќе инвестиции и подобро управување, наместо, како што наведуваат, „кампањи наместо резултати“.