Србија планира до крајот на годинава да ја започне изградбата на новиот нафтовод што ќе ја поврзува границата со Унгарија со Нови Сад, а завршувањето на проектот се очекува за околу две и пол години.
Министерката за рударство и енергетика на Србија, Дубравка Ѓедовиќ Хандановиќ, изјави дека првичниот план бил работите да започнат наесен, но дека почетокот зависи од тековните процедури.
Новиот нафтовод треба да обезбеди дополнителен правец за снабдување со сурова нафта и да ја намали зависноста од единствените постојни транспортни канали. Србија и понатаму ќе се снабдува преку ЈАНАФ, но врската со Унгарија ќе може да функционира и самостојно.
„Суштината е да не се потпирате само на еден правец на снабдување. Ако тој правец откаже од технички, економски или политички причини, треба да имате други можности“, посочи министерката.
Таа оцени дека целосно избегнување на зависноста од увоз не е можно, бидејќи Србија нема доволно сопствени количества нафта и гас. Затоа, како што наведе, клучно е зависноста да се распредели меѓу повеќе правци и добавувачи.
Изградбата на нафтоводот е предвидена на трасата од Хоргош до терминалот Нови Сад, вклучувајќи го и самиот терминал. На територијата на Србија трасата ќе биде долга нешто повеќе од 100 километри.
Планираниот капацитет на новиот нафтовод е околу 5,5 милиони тони сурова нафта годишно, а проектот ќе овозможи Србија да добива нафта од правецот на Унгарија, преку чија територија минува нафтоводот „Дружба“.
Компанијата „Транснафта“ од Панчево на крајот на декември распиша тендер за изградба на нафтоводот меѓу Србија и Унгарија.
