Поранешниот функционер на ВМРО-ДПМНЕ и актуелен водител на „Вечерното шоу на Богдан Илиевски“ на ТВ Алфа, Богдан Илиевски, со остра порака до оние кои ја критикуваат прославата на 35-годишнината од независноста на Македонија. (ТВ Алфа)
Под наслов „Среќен празник, намќори“, Илиевски на Фејсбук ги критикува ставовите според кои нема што да се слави поради проблемите во државата, потсетувајќи на коментарите за корупцијата, загадувањето, трагедиите и други општествени проблеми.
Според него, дел од критичарите ја користат секоја можност за негодување и создавање впечаток дека се „попроникливи“ од оние кои се радуваат на државните празници.
Илиевски прави споредба со прославувањето роденден, посочувајќи дека човек може да има проблеми и несовршености, но сепак да го слави фактот што живее.
„Денот на независноста не е прослава дека нема корупција или дека плочките на клинички не се променети или дека тротоарите немаат дупки, туку е славење на еден историски момент кога Македонија стана самостојна држава“, наведува тој.
Во објавата тој нагласува дека независноста не претставува награда за ниту една политичка партија или власт, туку историска можност граѓаните сами да ја градат и унапредуваат државата.
Илиевски смета дека критиката и прославувањето не се меѓусебно исклучиви. Според него, можно е човек истовремено да биде горд на државата и да бара одговорност за нејзините проблеми.
Тој ги споменува и трагедиите и проблемите од изминатите години, меѓу кои Кочани, модуларната болница, загадувањето и иселувањето, но оценува дека тие не треба да се користат како аргумент против државноста.
„Треба да ги поправаме грешките од минатите 35 години, а не да го омаловажуваме моментот кога сме добиле можност сами да одлучуваме за себе“, пишува Илиевски.
На крајот тој порачува дека на 8 септември нема да се слави „совршена Македонија“, туку фактот дека таа е своја држава.
„И бидејќи е наша, имаме право и обврска да ја правиме подобра“, наведува Илиевски, завршувајќи ја објавата со порака: „Да живее Македонија“.
