Српската „Алта груп“ казнета со 2 милиони евра, одземена дозволата за менувачница

Народната банка на Србија ѝ го одзеде овластувањето за вршење менувачки работи на компанијата „Алта груп“ од Белград, откако при контрола биле утврдени сериозни и повеќекратни незаконитости во нејзиното работење. На правното лице и на одговорното лице во компанијата им се изречени парични казни во вкупен износ од 250 милиони динари.

— реклама —

Според соопштението на Народната банка на Србија, контролата открила прекршувања на Законот за девизно работење и соодветните подзаконски прописи, како и сериозни неправилности во почитувањето на правилата за спречување перење пари и финансирање тероризам.

Контролата ја спровел тим од стручњаци од Секторот за девизни работи и кредитни односи со странство, во текот на повеќедневна и сеопфатна постапка. Од Народната банка наведуваат дека таа била спроведена независно од другите контролни функции, со почитување на професионалните стандарди и институционалната независност.

— реклама —

Поради тежината и обемот на утврдените неправилности, гувернерот на Народната банка донел решение за одземање на овластувањето за вршење менувачки работи, како и за изрекување парични казни во вкупен износ од 250 милиони динари(околу два милиони евра).

— реклама —

Од институцијата порачуваат дека нема да толерираат незаконито работење и постапки што го загрозуваат интегритетот на девизниот систем или ја нарушуваат ефикасноста на механизмите за спречување перење пари и финансирање тероризам.

Наодите од контролата, заедно со собраната документација и другите релевантни материјали, ќе бидат доставени до Јавното обвинителство за организиран криминал, Управата за спречување перење пари и, доколку е потребно, до други надлежни институции.

— реклама —

Народната банка на Србија соопшти дека ќе продолжи да постапува независно и одлучно во рамките на своите законски овластувања, со цел заштита на јавниот интерес и стабилноста на финансискиот систем на Србија.