Градоначалничката на Општина Кисела Вода, Бети Стаменкоска Трајкоска, обвини советници од политичката партија Левица за, како што наведе, провокации, закани и обиди за доведување на јавноста во заблуда, нагласувајќи дека тоа нема да ги запре проектите што се реализираат во општината.
Во своето обраќање, Стаменкоска Трајкоска директно му се обрати на советникот Петар, кого го обвини дека преку објавување снимки и вадење асфалт создавал „театар“ пред граѓаните.
„Нема да паднам на вашето ниво и на вашите провокации и на вашите закани“, рече таа, притоа изнесувајќи тврдење дека ѝ било заканувано по нејзините деца.
Градоначалничката оцени дека ваквото однесување придонесува граѓаните да се чувствуваат несигурно, додека, како што истакна, Општина Кисела Вода интензивно работи на повеќе проекти.
Таа посочи дека изградбата на основното училиште „Невена Георгиева-Дуња“ е при крај, иако рокот за завршување бил до следната година. Како пример го посочи и ООУ „Кирил Пејчиновиќ“, каде што, според неа, се создадени услови за едносменска настава со изградбата на дополнителни училници.
„Многу проекти за кои навистина со гордост како градоначалник можам да кажам, наместо да бидат завршени во 2027 година, тие се завршени предвреме. Така се работи за граѓаните“, порача Стаменкоска Трајкоска.
