Старбакс се откажа од алатката со вештачка интелигенција што требаше автоматски да ги следи залихите во кафулињата, само девет месеци по нејзиното воведување низ Северна Америка, објави Reuters.
Системот „Automated Counting“, базиран на вештачка интелигенција, требаше да помогне во управувањето со залихите, навременото нарачување производи и поддршката на вработените при подготовка на пијалаци.
Но, според извештаите, апликацијата често грешела при пребројувањето и означувањето на производите. Меѓу проблемите било и мешањето на различни видови млеко или целосно непрепознавање на дел од производите.
Во интерен допис до вработените, компанијата соопштила дека системот повеќе нема да се користи.
„Залихите на млеко и состојки за пијалаци отсега ќе се пребројуваат рачно, како и останатите категории инвентар во кафулињата“, се наведува во дописот.
Извршниот директор Брајан Никол претходно ја посочуваше технологијата како клучен дел од стратегијата за подобрување на работењето, а недостигот на состојки во продавниците го оцени како една од причините за падот на прометот.
Од „Старбакс“ сега велат дека одлуката е дел од процес на „стандардизација“ на следењето на залихите во сите кафулиња и најавија почесто дополнување на производите, дури и на дневно ниво.
Компанијата зад апликацијата, NomadGo, соопшти дека продолжува да учи од повратните информации од клиентите за да ги подобрува своите производи.
