„Ставена е точка дека становите се мотив“ – Туфегџиќ зборуваше за укинатата пресуда за таткото на Вања

Адвокатот Владимир Туфегџиќ, по одлуката на Апелациониот суд да ја укине ослободителната пресуда за Александар Ѓорчевски, оцени дека во образложението на второстепениот суд има две особено важни констатации – дека нема докази за комуникација на Ѓорчевски со обвинетите и дека прашањето за становите како можен мотив за кривичното дело е затворено, пренесе Телма.

„Прво, Апелациониот суд потврди дека нема докази дека Александар бил во комуникација и конекција со ниту еден од обвинетите. И втора работа, конечно е ставена точка на прашањето за становите како мотив за извршување на кривичното дело, а без мотив обвинението против Александар нема апсолутно никаква смисла“, изјави Туфегџиќ.

— реклама —

Тој изрази загриженост за дел од образложението на Апелациониот суд во кој, според неговото толкување, се бара да се утврди поврзаноста меѓу настаните од 24 и 27 ноември, како и околностите под кои била донесена одлуката за повторно грабнување на девојчето.

Според адвокатот, ваквото барање навлегува во делот од пресудата што се однесува на веќе осудените лица и нема правна логика да биде предмет на повторената постапка против Ѓорчевски.

— реклама —

Туфегџиќ се осврна и на оценките за однесувањето на Александар Ѓорчевски, посочувајќи дека судиите треба да ги земат предвид околностите во кои се наоѓале тој и Зорица.

— реклама —

„Сите пет судии од Апелациониот суд, пред да ја донесат одлуката, за да ги добијат одговорите за разумно или неразумно однесување на Александар, треба само за момент да се стават во улога на Зорица и на Александар“, рече адвокатот.

Тој нагласи дека членот 6 од Европската конвенција за човекови права бара судските пресуди да содржат јасни, категорични и непротивречни заклучоци, но смета дека Апелациониот суд можел самиот да интервенира доколку утврдил недостатоци во образложението.

„Доколку Апелациониот суд сметал дека тоа не е направено во доволна мера, можел истото да го исправи, односно да интервенира по тој дел, а не да го врати предметот на повторно разгледување и одлучување“, изјави Туфегџиќ.

Со укинувањето на ослободителната пресуда, предметот против Александар Ѓорчевски се враќа на повторно судење, а неговиот адвокат останува на ставот дека обвинението нема доволна доказна основа.