На денешен ден, пред точно 100 години, е родена една од најголемите филмски икони на 20. век, Мерилин Монро.
Родена како Норма Џин Мортенсон во Лос Анџелес, таа имала тешко детство, поминувајќи низ повеќе згрижувачки семејства и сиропиталишта. На само 16 години стапила во брак со полицаецот Џејмс Дохерти, а подоцна почнала да работи во фабрика каде што била забележана од фотографот Дејвид Коновер.
Токму тоа бил почетокот на нејзината кариера како модел, по што следувале и првите договори со холивудските студија. Сметајќи дека нејзиното вистинско име не е доволно привлечно за филмската индустрија, го избрала уметничкото име Мерилин Монро, инспирирано од актерката Мерилин Милер и моминското презиме на нејзината мајка.
Во текот на 1950-тите и почетокот на 1960-тите години, Монро стана глобален секс-симбол и една од најпознатите актерки во светот. Нејзините филмови остварија огромна заработка, а таа беше меѓу најплатените холивудски ѕвезди на своето време.
Најголема слава стекна со улогите во „Мажите повеќе сакаат русокоси“, „Како да се омажиш за милионер“, „Принцот и актерката“ и „Некои тоа го сакаат жешко“, за кој ја доби и престижната награда „Златен глобус“.
И еден век по нејзиното раѓање, Мерилин Монро останува една од најпрепознатливите и највлијателни личности во историјата на филмот и поп-културата.
