Додека Русија се соочува со сè поголем воен, економски и политички притисок, западните аналитичари и безбедносни претставници сè почесто го поставуваат прашањето каков ќе биде следниот потег на рускиот претседател Владимир Путин.
Според анализа на „Фајненшл тајмс“, пренесена од „Јутарњи лист“, западните влади се подготвуваат за период на можна ескалација на конфликтот, но мислењата за тоа како би можела да реагира Москва се поделени.
Една група аналитичари смета дека Путин, притиснат од состојбата на фронтот и домашните предизвици, би можел да се одлучи за поагресивни потези во обид да го промени текот на војната. Други, пак, оценуваат дека неговите можности за значителна ескалација се ограничени и дека поголема опасност е Западот, стравувајќи од таков развој, да изврши притисок врз Украина за отстапки.
Во анализата се издвојуваат четири можни насоки на евентуална руска ескалација: засилување на конвенционалните воени операции во Украина, употреба на тактичко нуклеарно оружје, директна конфронтација со НАТО или интензивирање на хибридните напади врз западната инфраструктура.
Според западни проценки, Русија месечно губи околу 35.000 војници – загинати или ранети – што дополнително го зголемува притисокот врз Кремљ. Иако се појавуваат шпекулации за можна општа мобилизација, аналитичарите предупредуваат дека таков потег би можел да предизвика незадоволство во руската јавност.
Во текстот се наведува дека, и покрај можноста за засилени ракетни и дронски напади врз украинските градови, тие тешко дека би донеле пресврт на фронтот.
Анализата се осврнува и на претходните закани од Москва за можна употреба на нуклеарно оружје, но посочува дека западните претставници денес им придаваат помало значење, бидејќи сметаат дека Кремљ е свесен за последиците од таков потег и за можната реакција на Западот.
Како уште едно потенцијално сценарио се споменува можноста за руски провокации кон балтичките земји или Полска, со цел да се создаде политичка и безбедносна криза во НАТО. Сепак, авторот оценува дека директен воен судир со Алијансата останува малку веројатен.
Според анализата, најреална опција за Москва останува хибридното војување, преку сајбер-напади и операции насочени кон критичната инфраструктура. Но и таквите активности, предупредуваат експертите, би можеле да предизвикаат силен одговор од западните земји.
Заклучокот на анализата е дека Русија и натаму има можности за ескалација, но секоја од нив носи сериозни ризици и потенцијално висока цена за Кремљ.
