Стојаноски: Предложените измени на Законот за минерални суровини не се никаква закана за животната средина, напротив сите постојни механизми за нејзина заштита остануваат целосно на сила

Пратеникот на ВМРО-ДПМНЕ, Бојан Стојаноски, изјави дека предложените измени на Законот за минерални суровини не претставуваат дерегулација ниту намалување на заштитата на животната средина, туку ограничени и прецизно дефинирани измени насочени кон јавни претпријатија и ресурси од јавен интерес.

Според него, измените се однесуваат исклучиво на субјекти врз кои државата има директна или индиректна контрола, како и на енергетски минерали и други ресурси со стратешко значење.

— реклама —

Стојаноски посочи дека со измените се воведува дополнителна контрола од страна на Владата, која ќе дава претходна согласност при доделување концесии за детални геолошки истражувања за одредени минерални суровини од јавен интерес.

— реклама —

Тој нагласи и дека во постапката за добивање дозвола за експлоатација ќе може да се користи одлука за поведување постапка за експропријација, но само за проекти од јавен интерес.

„Не се укинуваат имотно-правните односи, туку се овозможува поефикасно усогласување на постапките за стратешки државни проекти“, истакна Стојаноски.

— реклама —

Според него, измените имаат цел да ги отстранат административните пречки и да овозможат побрза реализација на проекти, особено во енергетскиот сектор, без намалување на стандардите.

— реклама —

Тој потенцираше дека остануваат во сила сите обврски за студии за влијание врз животната средина, инспекциски контроли, како и правилата за управување со отпад и води.

Стојаноски оцени дека со измените не се отвора простор за неконтролирано доделување концесии на приватни субјекти, туку напротив – се зајакнува улогата на државата во управувањето со природните ресурси од стратешко значење.