Странците ќе можат да добијат аргентинско државјанство со инвестиција од 350.000 долари

Аргентина подготвува нова програма со која богатите странски државјани ќе можат да добијат аргентинско државјанство во замена за значителен финансиски придонес или инвестиција во државни обврзници.

Програмата ја најавија министерот за економија Луис Капуто и шефот на кабинетот Диего Сантилји, а првите апликации се очекува да бидат поднесени во последниот квартал од годинава.

— реклама —

Според предложените услови, кандидатите ќе можат да изберат меѓу две опции. Првата предвидува неповратна уплата од најмалку 350.000 долари во аргентинската државна каса, додека втората опција е купување државни обврзници во вредност од 800.000 долари.

Оние што ќе ја изберат инвестицијата во обврзници ќе мора да ги задржат најмалку седум години. За вклучување на сопружникот и децата во програмата ќе се плаќаат дополнителни средства.

— реклама —

Владата очекува програмата да привлече до 2,5 милијарди долари доколку биде постигнат планираниот број инвеститори.

На Аргентина ѝ е потребен свеж капитал во период кога земјата се подготвува за значителни отплати на долгови. Во 2027 година доспеваат речиси 25 милијарди долари државни обврски во странска валута, додека пристапот на Буенос Аирес до меѓународните пазари на капитал и натаму е ограничен.

Владата на претседателот Хавиер Милеи во изминатиот период спроведува мерки за намалување на буџетскиот дефицит и инфлацијата, а паралелно работи на зголемување на девизните резерви и привлекување странски инвестиции.

— реклама —

Една од предностите за потенцијалните кандидати би бил аргентинскиот пасош, кој овозможува патување без претходно добивање виза во повеќе од 140 земји.

Сепак, кандидатите ќе мора да поминат безбедносни и финансиски проверки, вклучително и проверка на криминалното досие и потеклото на средствата.

— реклама —

Слични програми постојат во повеќе земји, но директното стекнување државјанство преку инвестиција е поретко во споредба со таканаречените „златни визи“, кои најчесто овозможуваат право на престој.

Ваквите шеми во изминатите години се соочуваат со критики поради ризиците од перење пари, корупција и злоупотреба на државјанството, поради што аргентинските власти најавуваат детални проверки на кандидатите.