Страв од чума во Русија по кршење епрувета со опасен патоген, под надзор речиси 200 лица

Белата куќа ја следи ситуацијата во Русија по информациите за можна појава на чума и воведувањето карантин во неколку здравствени установи, изјавил за „Аксиос“ неименуван претставник на администрацијата на Доналд Трамп.

Руските здравствени власти презеле превентивни мерки по смртта на 28-годишната Дарија Шипилова, која работела во истражувачки институт за борба против чумата во Иркутската област. Сепак, руските власти досега не потврдиле дека таа била заразена со чума.

— реклама —

Според претходни информации на локалните медиуми, Шипилова на 25 септември скршила епрувета со патоген на белодробна чума. Четири дена подоцна била примена во болница со симптоми на тешко воспаление на белите дробови, а починала во ноќта меѓу 1 и 2 октомври.

По нејзината смрт, властите вовеле карантин во неколку медицински установи во регионот и ставиле под медицински надзор близу 200 лица кои биле во контакт со неа.

— реклама —

Гувернерот на Иркутската област, Игор Кобзев, изјавил дека лицата под надзор немаат знаци на болест и дека нивните тестови се негативни.

Руската агенција за јавно здравје соопштила дека Шипилова имала „пневмонија со непозната етиологија“, а дополнителните тестирања не откриле микроорганизми поврзани со нејзината работа. Агенцијата оценила дека епидемиолошката состојба во регионот останува стабилна.

— реклама —

Иако дел од руските медиуми известуваа за можноста таа да била заразена со белодробна чума, дијагнозата досега не е потврдена.

Претставник на администрацијата на Трамп за „Аксиос“ изјавил дека американската администрација е запознаена со случајот, ја следи ситуацијата и ги разгледува можните постапки.

— реклама —

Чумата е бактериска болест која може да биде опасна, но според американскиот Центар за контрола и превенција на болести (CDC), може да се лекува со антибиотици доколку терапијата започне навреме.

Последниот регистриран случај на чума во Русија бил забележан во 2016 година на Алтај. Природни жаришта на чума и понатаму постојат во Монголија, вклучително и во области во близина на руската граница.