Портпаролот на партијата, Валентин Манасиевски, на денешната прес-конференција обвини дека СДС го блокира Изборниот законик поради страв дека ќе ја изгуби поддршката од македонската дијаспора на следните избори.
Манасиевски изјави дека, според ВМРО-ДПМНЕ, голем број граѓани ја напуштиле државата поради, како што рече, „катастрофалното раководење“ на СДС.
„СДС не само што ги избрка граѓаните од државата, туку сега не сака ниту да им го олесни начинот на гласање на изборите, затоа што знае дека нема да ја добие нивната поддршка. Поради тоа го блокира Изборниот законик со над 10.000 амандмани“, изјави Манасиевски.
Тој оцени дека вистинската причина за блокадата е, како што рече, „стравот од уште поголем пораз на следните избори“.
Манасиевски истакна и дека измените на Изборниот законик, според него, се дел од реформските обврски на државата, додавајќи дека амбасадорот на Европската Унија во земјава, Михалис Рокас, повикал на политички консензус за нивното усвојување.
Од ВМРО-ДПМНЕ порачаа дека, според нив, граѓаните ја препознале намерата на СДС и дека тоа ќе се одрази на следниот изборен циклус.
