Зголемената употреба на алатки со вештачка интелигенција, како ChatGPT, може да има сериозни последици врз човечките когнитивни способности, предупредуваат научниците.
Истражувачката Наталија Космина забележала дека биографиите на кандидати за пракса стануваат сè повеќе слични, што укажува дека тие масовно користат chatbot-алатки. Паралелно, на своите предавања на MIT, таа забележала дека студентите побрзо го забораваат материјалот отколку порано.
Научно истражување спроведено од MIT Media Lab опфатило 54 студенти поделени во три групи: едни користеле ChatGPT, други интернет пребарување, а третите работеле самостојно. Резултатите покажале дека студентите кои размислувале без помош имале најсилна мозочна активност, додека кај оние што користеле ChatGPT таа била намалена за дури 55 проценти.
Дополнително, студентите кои користеле вештачка интелигенција тешко се сеќавале на сопствените текстови и не чувствувале „сопственост“ врз напишаното. Есеите, според оценувачите, биле слични, без оригиналност и длабочина.
Слични заклучоци доаѓаат и од истражувачи од University of Pennsylvania, кои предупредуваат на појава на „когнитивна предаја“ – тенденција луѓето да ги прифаќаат одговорите на вештачката интелигенција без критичко размислување.
Компјутерската невронаучничка Вивиен Минг истакнува дека ваквата зависност може да доведе до намалена мозочна активност и потенцијално зголемен ризик од когнитивен пад во иднина. Според неа, длабокото размислување е „супермоќ“ која мора постојано да се користи.
Истражувањата укажуваат дека прекумерното потпирање на технологија може да влијае и на меморијата, како што претходно беше забележано со таканаречениот „Google ефект“ и користењето на GPS навигација.
Експертите препорачуваат внимателна употреба на вештачката интелигенција. Наместо целосно потпирање, тие предлагаат развој на „хибридна интелигенција“, каде човекот прво сам размислува, а потоа ја користи технологијата како алатка за дополнително унапредување на идеите.
