Студентската листа го пријави Ненад Стефановиќ за злоупотреба на службената положба

Кандидатите за пратеници на Студентската листа во Србија поднесоа кривична пријава против главниот јавен обвинител на Вишото јавно обвинителство во Белград, Ненад Стефановиќ, поради сомнежи за злоупотреба на службената положба и намерно погодување на обвинети во повеќе предмети.

— реклама —

Во пријавата се наведуваат сомнежи за незаконско ублажување на казните на претходно осудувани лица, примена на поблага правна квалификација во предмет во кој станува збор за 119 парчиња муниција, повторно поднесување спогодба што претходно била одбиена од друг судија, како и откажување од кривично гонење на одредени обвинети.

Од Студентската листа бараат детално да се испитаат спорните предмети и да се утврди кои јавни обвинители учествувале во подготовката, одобрувањето и склучувањето на спогодбите.

— реклама —

Немања Ѓуриќ, виш судски соработник во Вишиот суд во Белград и кандидат за пратеник на Студентската листа, посочи дека обвинителот во постапката за склучување спогодба за признавање вина може да побара поблага казна, но не и казна под законски утврдениот минимум, пренесува РТС.

— реклама —

Стефановиќ, во изјава за „Њузмакс Балканс“, рече дека очекува Јавното обвинителство за организиран криминал што поскоро да ја разгледа пријавата, да ги провери сите наводи и да ги утврди релевантните околности.

„Не би ги коментирал јавно наводите во пријавата, ниту квалификациите изнесени во неа, за кои дознав од медиумите, а според кои пријавата се однесува на спогодби за признавање вина потврдени со судски пресуди“, изјави Стефановиќ.

— реклама —

Тој додаде дека и во овој случај ќе ги почитува Уставот, законите и одлуките на надлежните институции.